ಈ ರೂಲ್‌ಇದೆಯಲ್ಲಾ, ಇದನ್ನು ಅನುಸರಿಸುವುದು ಬಹಳ ಕಷ್ಟ. ಯಾಕೆಂದರೆ ಈ ನಿಯಮವನ್ನು ಒಂದೂ ದಿನ ಸಡಿಲಿಸುವಂತಿಲ್ಲ. ಪ್ರತಿದಿನವೂ ಕಠಿಣ ವ್ರತದಂತೆ, ಶಪಥದಂತೆ, ಪ್ರೀತಿಯಂತೆ. ಶಾಸನದಂತೆ ಆಚರಿಸಬೇಕು. ಒಂದು ದಿನ ಪಾಲಿಸದಿದ್ದರೂ ಗ್ರಹಚಾರ ತಪ್ಪಿದ್ದಲ್ಲ. ಒಂದು ದಿನ ಉಲ್ಲಂಘಿಸಿದರೂ ಜೀವನವಿಡೀ ಜನರ ಟೀಕೆಗೆ, ನಿಂದನೆಗೆ ಗುರಿಯಾಗಬೇಕು.

ಉದಾಹರಣೆಗೆ ನಿಮ್ಮ ಹೆಂಡತಿಯಿರಬಹುದು, ಮಕ್ಕಳಿರಬಹುದು ಅದರ ಜತೆ ಎಂದಿಗೂ ಸುಳ್ಳು ಹೇಳುವಂತಿಲ್ಲ. ಮೋಸ ಮಾಡುವಂತಿಲ್ಲ. ಈ ನಿಯಮವನ್ನು ಒಂದು ದಿನದ ಮಟ್ಟಿಗೆ ಮುರಿದಿರಿ ಎನ್ನಿ. ಅವರು ನಿಮ್ಮನ್ನು ಜೀವನವಿಡೀ ನಂಬುವುದಿಲ್ಲ. ಸದಾ ಸಂದೇಹದಿಂದಲೇ ನೋಡುತ್ತಾರೆ. ನಿಮ್ಮ ಪ್ರತಿ ನಡೆ-ನುಡಯನ್ನು ಅನುಮಾನದಿಂದಲೇ ಗಮನಿಸುತ್ತಾರೆ. ಅಂದು ಮೋಸ ಮಾಡಿದವ, ಸುಳ್ಳು ಹೇಳಿದವ ಇಂದೂ ಹೇಳುವುದಿಲ್ಲ ಎನ್ನೋದಕ್ಕೆ ಏನು ಗ್ಯಾರಂಟಿ ಎಂದು ಗುಮಾನಿಯನ್ನು ವ್ಯಕ್ತಪಡಿಸುತ್ತಾರೆ. ಜೀವನದ ಕೊನೆಯ ಉಸಿರು ಇರುವ ತನಕ ನೀವು ಪಕ್ಕಾ ನಿಷ್ಠಾವಂತರಾಗಿದ್ದರೂ, ಆ ಒಂದು ದಿನದಂದು ನೀವು ಹೇಳಿದ ಸುಳ್ಳು, ಮಾಡಿದ ಮೋಸ ಅವರ ಮನಸ್ಸಿನಲ್ಲಿ ಕೊನೆತನಕ ಅಚ್ಚಳಿಯದೇ ಉಳಿದುಬಿಡುತ್ತದೆ. ಎಷ್ಟೇ ಪ್ರಯತ್ನಿಸಿದರೂ ಅದನ್ನು ಮನಸ್ಸಿನಿಂದ ತೆಗೆದು ಹಾಕಲು ಸಾಧ್ಯವಿಲ್ಲ.

ಆದ್ದರಿಂದ ನಾವು ಒಳ್ಳೆಯರಾಗಿ ಇರುವುದೆಂದರೆ ಕೇವಲ ಇಂದು, ನಾಳೆ, ನಾಡಿದ್ದು, ಒಂದು ವರ್ಷ, ಐದು ವರ್ಷ… ಒಳ್ಳೆಯವರಾಗಿ ಇರುವುದಲ್ಲ. ಸಾಯುವ ತನಕವೂ ಒಳ್ಳೆಯವರಾಗಿ ಇರುವುದು. ಒಂದು ಸಲ ಯೋಚಿಸಿ, ಇದೆಷ್ಟು ಕಠಿಣ ನಿಯಮ ಎಂದು. ಕಚೇರಿಯಲ್ಲಿ, ಸ್ನೇಹಿತರ ಬಳಗದಲ್ಲಿ, ಸಮಾಜದಲ್ಲಿ ನಾವು ನಿರಂತರ ಪಾಲಿಸುತ್ತಲೇ ಇರಬೇಕಾದ, ಸ್ವಲ್ಪವೂ ರಿಯಾಯಿತಿ ಇಲ್ಲದ, ನಿಯಮವಿದು. ಯಾವುದೋ ಕ್ಷುಲ್ಲಕ ಕಾರಣಕ್ಕೆ ಇರಬಹುದು, ನಿಮ್ಮ ಆತ್ಮೀಯ ಸ್ನೇಹಿತನಿಗೆ ಜೋರಾಗಿ ಮಾತಾಡಿದಿರಿ ಎನ್ನಿ. ಆತನಿಗೆ ನಿಮ್ಮ ಬಗ್ಗೆ ಗೌರವ ತುಸು ಕಮ್ಮಿಯಾಗಬಹುದು. ನಿಮ್ಮ ಈ ಸಣ್ಣ ನಡೆ ನಿಮ್ಮ ವ್ಯಕ್ತಿತ್ವಕ್ಕೇ ಕಪ್ಪು ಚುಕ್ಕೆಯಾಗಬಹುದು. ಅದು ಶಾಶ್ವತ ಕಪ್ಪು ಚುಕ್ಕೆಯಾಗಿಯೇ ಉಳಿಯಬಹುದು.

ನನಗೆ ಇಲ್ಲಿ ಒಬ್ಬ ಫುಟ್ಬಾಲ್ ಗೋಲ್ ಕೀಪರ್ ಹೇಳಿದ ಮಾತು ನೆನಪಾಗುತ್ತದೆ- ‘ಸದಾ ಒಳ್ಳೆಯ ವ್ಯಕ್ತಿಯಾಗಿರುವು ದೆಂದರೆ ಗೋಲ್‌ಕೀಪರ್ ಇದ್ದಂತೆ. ಫುಟ್ಬಾಲ್ ಆಟದಲ್ಲಿ ನೀವು ಅವೆಷ್ಟೇ ಸಲ ಗೋಲ್ ಆಗದಂತೆ ಬಾಲ್‌ನ್ನು ತಡೆದಿರಬಹುದು. ಆದರೆ ಜನ ನೆನಪಿಟ್ಟುಕೊಳ್ಳುವುದು ನೀವು ಬಾಲ್ ತಡೆಯದೇ ಗೋಲ್‌ಗೆ ಕಾರಣವಾಗಿದ್ದನ್ನು ಮಾತ್ರ’ ಎಂಥಾ ಮಾತು!